Sariak

Donostiako Lau Haizetara Dokumentalen Koprodukzio Foroak, EPE-IBAIAk antolatuak, ELKARGIren laguntza jasotzen jarraitzen du eta aurten ere 5.000 euroko saria emango dio pitch onenari.

Honen helburua, dokumentalen generoko kalitatezko proiektuen garapen-prozesuan beste aurrerapauso bat eman eta proiektu horiek abiarazten laguntzea da.

2025ko irailaren 24ean gauzatuko diren pitching saioetan parte hartuko duten proiektu guztiek eskuratu ahalko dute saria.

Commissioning Editors Panelak egingo ditu epai-lanak, eta Panelak berak aukeratuko du proiektu irabazlea, proiektuaren beraren aurkezpena, originaltasuna, tratamendua eta zabalkunde-indarra balioetsita.

Proiektuaren irabazlearen izena Foroaren amaiera-ekitaldian jakinaraziko da, Irailean 24ean.

Musika-gaiei buruzko aholkularitza jasoko dute proiektu parte-hartzaileek eta 2.000 euroko sari bat emango da eskudirutan, baita proiektu irabazlearen musika deskargatzeko eta sinkronizatzeko tarifa lau bat ere.

Bi erakundeek duela urte batzuk itxi zuten akordio bat, eta beren katalogo eta zerbitzuen gaineko deskontuak eskaintzen dizkiete elkarteari berari zein elkarteko kideei akordio horri esker. 2 urteko indarraldia izango du lankidetza-esparru berriak, Lau Haizetara Foruari lotuta egongo da eta foroan parte hartzen duten proiektuen garapena sendotzen lagunduko du Music Library&SFX enpresaren ordezkariek musika-gaiei buruz eskainiko dituzten aholkularitzaren eta mentorien bidez. Horrekin batera, bi sari emango ditu enpresak, 2.000 euroko sari bat eskudirutan batetik, eta katalogoen produkzio-musika sinkronizatzeko musika hori mugarik gabe deskargatzea ahalbidetuko duen tarifa lau bat bestetik, proiektuaren promozio-edukietarako musika lagatzeaz gain.

Donostiako Lau Haizetara Dokumentalen Koprodukzioko Foroak eta film, dokumental eta serieen banaketaren, salmentaren eta produkzioaren arloan espezialista den DOGWOOF agentziak akordio bat lortu dute dokumentalen industriaren alde egiten ari diren apustua bultzatu eta indartzeko. Nazioarteko zinemaldi eta salmentetarako aholkularitza sari bat izango da.

Dokumentalen agentzia bat dugu DOGWOOF, 2003an sortutakoa eta egoitza Londresen duena, eta produkzioa, finantzaketa, salmentak eta mundu osorako banaketa uztartzeaz gain, marka global liderra bihurtu da dokumentalaren alorrean. Orain arte Oscar sarirako izendatutako 31 dokumental aurkeztu dituzte, haietako bost irabazle izan direlarik, eta beste lauk BAFTA sariak lortu dituztelarik. Gaur egun bere produkzioko eta garapeneko jarduerak gehitzen ari da agentzia, kalitate handieneko edukia erakusten duen emaitza eskainiz.

Donostiako Lau Haizetara Dokumentalen Koprodukzioko Foroak eta Preciosa Media banatzaileak berritu egin dute beren lankidetza-akordioa, dokumentalaren industriaren alde egiten duten apustua bultzatzen eta indartzen jarraitzeko helburuarekin. Bigarren urtez jarraian, banaketako, zinemaldietako bideko eta pantailetako aholkularitza-sari bat emango du banatzaileak, hau da, 4 orduko aholkularitza birtuala.

Banaketa komertzialeko estrategia onena eskaini nahi du eta proiektu irabazlearentzako internazionalizazio-bide onena definitu nahi du ekimen honek.

EPE-IBAIA – Bilibin Circular Saria Donostian irailaren 25ean egingo den LAU HAIZETARA Foroan aurkeztutako proiektuetako bati emango zaio, eta ingurumen-aholkularitzako kontsultoretza bat gauzatzea izango da, online egindako zenbait lan-saioren bidez, eta horrela proiektuari errazagoa gertatuko zaio administrazioek abian jartzen dituzten laguntzak lortzeko administrazio horiek ezartzen ari diren beharrezko eskakizunak betetzea.

Bilibin Circular ekonomia zirkularreko kontsultoretza-enpresa bat dugu, jasangarritasuna lortzeko enpresek daramaten eraldaketa-prozesuan inplikatua, eta ikus-entzuneko sektorearen esparruan “Basque Green Film” proiektuaren idazkaritza teknikoaz arduratzen ari dena, Eusko Jaurlaritzaren Kultura Sailak abiarazitako proiektu horretan, hain zuzen ere.

EPE-IBAIAk (Ikus-entzunezkoen Euskal Ekoizle Burujabeen Elkartea) antolatutako Donostiako Lau Haizetara Foroak eta Miarritzeko FIPADOC jaialdiak beren harremana indartzen dute, bi ekitaldi horietan garatutako jardueren barruan ikus-entzunezko industria sustatzeko.

Akordio horri esker, Miarritzeko FIPADOC-en parte hartu duen proiektu bat, gure hautaketa batzordeak aukeratua izango da eta Donostiako Lau Haizetara Foroan parte hartzeko aukera izango du. Era berean, Lau Haizetara foroan parte hartzen duen proiektuetako bat, Miarritzeko FIPADOC-en hurrengo edizioan egongo da (Urtarrila 2025).

DocsBarcelonak eta Donostiako Lau Haizetara Foroak lankidetza-akordio bat sinatu dute, bi ekitaldien artean dokumentalen proiektuak elkartrukatzeko.

Aliantza honen helburua da dokumentalen generoan osagarriak eta espezializatuak diren bi merkatutan proiektuen presentzia sustatzea, eta era horretan euren garapen- eta finantzaketa-prozesua osatu ahal izan dezaten laguntzea.

Antolakuntza Erakundeen arteko ahaleginak, urtero Donostiako Lau Haizetara Foroan aurkeztutako proiektuetako bat eta DocsBarcelonako speed meetings-etan parte hartzen duen proiektuetako bat, bi merkatuetan egotea ahalbideratzen du. Proiektu hauek, dagozkien hautaketa-batzordeek erabakiko dituzte.